政情：林鄭好打得 擂台招「親」
政府早前成立政策及項目統籌處，負責統籌扶貧及人口政策，等資源唔使重疊。部門由「好打得」嘅政務司司長林鄭月娥統領，最近政府開始對外請人，政策及項目統籌主任一職人工唔錯，起薪點由七萬一千蚊起，頂薪九萬三千幾蚊。不過入職條件相當「辣」，差唔多要求全能瓣瓣通，由項目設計、經濟分析、規劃管理到建築工程測量都要識。其中一項專業更要至少三年全職經驗。
要識規劃管理建築測量
唔好以為呢七萬蚊易賺，根據政府職位空缺列出嘅條件，對政策及項目統籌主任除咗要有基本嘅大學學位同語文能力要求外，仲要具備十幾項知識，包括財務經濟分析、項目設計、規劃管理，甚至連專業技能如測量、建築、工程都要識，同十項全能無分別。
能夠識晒咁多項唔同技能，私人機構好少有，政務官應該可以對號入座，但呢個位除咗要七年全職經驗外，仲要最少四年政府以外嘅任職經驗，換言之現任政務官就唔使諗喇。最後一項條件係求職者要有出色溝通、組織同管理能力，仲要專業領域以外有廣博知識。即係點？即係要乜都識囉。
如果能夠過到入職條件嘅，相信同林太一樣都係「好打得」之人，但呢個位要做咩呢？招聘廣告話統籌主任要接收同分析統籌處嘅項目建議，又要同政策局部門開會，或者實地視察。仲有協助處長評估項目建議嘅經濟社會效益，同埋為扶貧、人口政策兩個小組提供支援等。
就咁睇啲職責已經水蛇春咁長，呢份工真係唔易打。睇埋最尾一行，原來仲要「執行其他獲委派嘅職務」，明晒啦，即係乜都做囉。呢個位乜都要識，乜都要做，但人工最多都係得九萬蚊，相信脫穎而出嘅候選人，一定非池中物。主任之上，仲會有處長同副處長。
休假返港 林鄭探板間戶
統籌主任都要萬能咁打得，負責統領嘅林鄭又點敢怠慢，佢從英國返港後立即復工，前晚拆禮物日已經微服出巡去咗深水埗探望天台戶同板間戶，發現普遍訴求係希望獲編配公屋，過有瓦遮頭嘅生活。跟住林鄭呢位盡責老細，真係唔易做呢。