中環出更：蔡和平踩爆無綫亞視
早前浙江省同鄉會聯合會青年委員會一班年輕人，喺開業一年就勇摘米芝蓮一星嘅會所餐廳浙江軒歡聚，曾經創造《歡樂今宵》等膾炙人口電視節目嘅視壇老行尊蔡和平（Robert）都有現身。講起增發免費電視牌照，Robert不留情面批評亞視嘅表現「好渣」，冇乜節目好睇，如果滿分係一百分，亞視連十分都冇，所以畀市民多個選擇未必係壞事。
Robert又鬧埋無綫嘅綜藝節目經常玩低級趣味，一樣抵鬧，仲話電視台嘅好壞取決於節目內容質素，如果新加入嘅投資者冇呢個原則，咁香港都唔需要再多一間免費電視台提供垃圾節目喎。
車弘健發掘低調鄉里
是夜到場嘅浙聯兄弟姊妹包括青委主席車弘健（Anthony），仲有浙江軒老闆之一嘅Van Klaren珠寶董事總經理蔡相理等人。Anthony最近分別當選紹興旅港同鄉會會長同埋上海總會理事兼青年組主任委員，佢躊躇滿志盤算未來，話將與省內唔同縣市玩Crossover，發掘更多低調嘅鄉里現身。