中環出更：黃家和遊法 自駕二千公里
唔少人去旅行都鍾意自駕遊，隨心所欲想去邊就去邊。愛歎靚紅酒嘅餐飲聯業協會會長黃家和（Simon）經常到法國參觀各區酒莊，月初佢就租咗架意大利名車Alfa Romeo自駕遊法國八日，由南部波爾多一路揸到北部布根地，累積行咗二千公里，都咪話唔攰。不過Simon就話好享受箇中樂趣，因為可以欣賞沿途一望無際嘅景致。
Simon今次去法國係半公半私，除咗傾生意之外，主要係出席位於普羅旺斯嘅聖馬田酒莊女莊主Mrs De Barry嘅聖誕派對。佢話，呢個有三百多年歷史嘅酒莊，係當地第一家被評定為Cru Classe級別，前法國總統招待貴賓時，都係用呢個酒莊嘅酒喎。當晚東主請咗一隊中世紀樂隊即場演奏，Simon仲有同主人家齊齊載歌載舞添！
去到布根地，Simon經過生產名酒Chambertin嘅產區，佢話據講當年法國革命英雄拿破崙每次打仗，都要帶呢隻酒喺身，而佢喺滑鐵盧一役中敗陣，就係因為唔記得帶呢支酒。
探酒莊 買紅酒
Simon話自己家中收藏咗十支Chambertin，目前每支價值逾一萬六千元，估計明年仲會升值。
Simon話，今年布根地天氣反覆令葡萄失收，預計明年該區佳釀嘅價格會被炒貴。佢就建議大家可以買Corbieres產區較冷門嘅紅酒，酒味強烈之中滲出成熟葡萄香氣，亦係上佳之選。
卓妮