油麻地食肆阻街失控
油麻地文英街一帶食肆林立，但非法擴張營業情況亦幾近失控，造成阻街及製造的噪音均被指嚴重擾民！「成條街都擺晒枱櫈，早晚市都咁墟冚，我哋附近啲居民就慘啦，又嘈又污糟，有時到凌晨兩三點都係咁嘈！」關先生直指住所樓下一帶食肆阻街問題嚴重，曾多次向食物環境衞生署投訴，惟一直未見改善。
食環署發言人稱，接獲轉介後曾巡查上址，發現有食肆非法擴展營業範圍，在舖前擺放桌椅，遂檢控食肆持牌人。由去年至今，該署共接獲六十三宗相關投訴，並向上址食肆發出六十二個口頭警告及二十三封警告信，並提出共十八宗檢控。
「點解咁多投訴，出過咁多警告都仲係咁？究竟係食環署捉得唔夠，定係檢控根本冇阻嚇作用？」關先生不滿當局根治問題不力，令市民求助無門，居住環境持續受到滋擾。