堤壩如果穿窿，將會有乜嘢後果呢？唔使講啦，一定會造成大大小小嘅危險，洪水一到就會沖毀堤壩，隨時導致家破人亡，話唔定有人仲好似少年Pi咁樣奇幻漂流，漂咗去邊都冇人知。
食環署嘅食物安全中心理論上係一道負責把關嘅堤壩，防止問題食品源源不絕流入本地市場，只可惜呢一道堤壩原來係穿窿o架，乜鬼嘢禽流雞呀，乜鬼嘢哮喘豬呀，乜鬼嘢農藥菜呀，經常性越堤而過，直情如入無人之境咁嘅款。你知啦，國產奸商好有創意又好有膽識o架，十八般武藝樣樣皆能，唔嚴防真係毒鬼死你都有之。
呢嗱嗱嗱，坊間近日盛傳一張幾乎長過萬里長城嘅食肆名單，擔心呢一批食肆用嘅係有問題嘅混合油甚至坑渠油。後知後覺嘅食環署慢三拍先至出動，去到相關工場、糧油供應商以及十二間食肆巡查，抽取三十九個樣本測試是否含有致癌物質苯並〔a〕芘（Benzo〔a〕pyrene）。食物安全中心公布，三十九個樣本之中有兩個樣本嘅苯並〔a〕芘含量分別係每公斤十六同十七微克，超出國家標準每公斤十微克，亦超出歐盟標準每公斤兩微克，即係超標七倍半。另外，有兩個樣本嘅苯並〔a〕芘含量低於國家標準但超出歐盟標準，分別係五點八同六點二微克。
致癌食油事件當然引起全城恐慌啦，「東方報業民意調查」顯示，四成四受訪者認為市民健康受威脅；兩成五擔心經常外出用膳易中招；兩成四覺得香港美食天堂嘅聲譽受損害。
對於食環署恒常監察食油測試項目不包括檢驗苯並〔a〕芘，法例亦冇制訂法定限值，四成二受訪者認為必須修例加強監管；三成覺得法例存在漏洞猶如無王管；兩成三批評香港嘅檢驗標準落後。喂，受訪者講得絕對冇錯o架，歐盟有標準，內地有標準，香港竟然冇標準，唔係落後又係乜呢？香港成日都話係中國最有競爭力嘅城市，檢驗食油居然冇標準，把關不力嘅官老爺簡直係香港競爭力嘅敗家仔啦！
民意調查又顯示，四成九受訪者不滿食環署監管食油冇做好把關工作；兩成四斥責官方後知後覺。總之家陣嘅情況就係，食安機制甩甩漏漏，防毒堤壩到處穿窿。咁點算好呢？正所謂咯喎，不怕狼一樣嘅對手，只怕豬一樣嘅隊友，食環署身為把守最後一關嘅守門員，唔該唔好再失守屙蛋啦！
堤壩有穿窿就要補，法例有漏洞就要修，聖誕節應該普天同慶嘛，冇理由任得食油致癌嚇破膽！