政情：公民講場：爛機賣億五煲呔針狼胎

數碼廣播有限公司（dbc）喺創辦人鄭經翰（煲呔針）揸旗下多災多難，兩個月以來經歷停播、義播再停播，死去活來咗幾次，連通訊事務管理局都睇唔過眼，建議吊銷dbc嘅廣播牌照三十日以示懲戒，咁搞法dbc遲早一個仙都唔值。正當dbc被煲呔針玩到瀕死邊緣，早前打死唔肯注資嘅股東之一黃楚標忽然考慮用底價一億五千萬元，買入煲呔針同另一股東何國輝嘅股份。講真，一億五千萬元對坐私人飛機出入嘅「深圳王」黃楚標算得係咩吖，但買嘢都係要物有所值至得，黃楚標睇怕都係睇個廣播牌照分上嘅啫。