政情：名人評判談飲食之道
大魚大肉，以往係富貴嘅象徵。但時至今日，食得清淡至係潮流。提升快樂指數基金同中華廠商會尋日喺工展會合辦咗個親子烹飪比賽，幾位獲邀任評判嘅城中名人同大家分享點至食得健康。
評判之一嘅敍福樓集團執行董事黃傑龍話，食得健康係飲食界嘅大趨勢，所以重手落油者一定會扣分！其實只要廚藝到家，少油少鹽少糖一樣可以好滋味。佢話環保意識抬頭，素食成為一股新勢力，例如時下Green Monday所提倡嘅每周一次素食，無論對身體對環境都有莫大好處，絕對值得推廣。
細味菜餚 尊重廚師
而另一位評判，餐飲聯業協會會長黃家和則呼籲大家注重慢食文化，佢話飲食既然係一種享受，又何必要囫圇吞棗。慢食不但有助消化，又可以細味菜餚嘅味道與廚藝嘅精巧，仲係對廚師嘅一種尊重。
第三位評判、中華廠商會會董陳國民雖然係以生產電器起家，但對於飲食亦有研究。佢話受健康與環保嘅風氣影響，已放棄佢以往喜愛嘅豬油與魚翅。陳國民話佢得閒會煮番幾味，構思少油嘅健康煮食方式，從中仲得到電煮食鍋嘅設計靈感。