政情：價錢平選擇多 張宇人打邊爐愛冰鮮牛
內地供港活牛數量愈嚟愈少，令新鮮牛肉批發價格今年內第六次加價，一斤牛肉直逼百元大關。當唔少市民猛話唔捨得食貴牛之際，立法會飲食界張宇人（Tommy）就向市民教路，話市民唔一定要揀新鮮牛肉，市面上仲有冰鮮牛肉、雪藏牛肉兩種，而且價格平得多，只要配合番適當嘅食法，都可以一樣咁滋味，佢自己更加係冰鮮牛肉嘅愛好者。
出晒名識飲識食嘅Tommy以專家口脗解釋，話食雞肉同食豬肉，當然愈新鮮愈好，但食牛肉就唔一定係喎。
鮮牛肉未必正
佢話新鮮牛肉當然有新鮮嘅好，但冰鮮牛肉亦有佢獨特好處，因為牛肉要放置一段時間，肉身內含嘅酵素會隨時間產生aging（熟成）作用，唔止令肉味更濃、食落口仲嫩滑無渣。
Tommy話冰鮮牛肉最佳食法係用嚟打邊爐，所以次次打親邊爐佢都揀冰鮮牛，貪佢產地有加拿大、澳洲、巴西等，選擇多到數唔晒。最近唔少市民都要求港府開放新鮮牛肉市場，以免被五豐行壟斷，Tommy就話一向支持有競爭，但聽聞政府諗法唔係咁，覺得開放市場都冇人肯做，價格難以回落喎。