政情：教協謀創黨轉戰直選
立法會教育界功能組別議席多年來一直由教協中人出任，而無論係前教協會長司徒華，定係啱啱卸任嘅副主席張文光，都同時身兼教協執委同民主黨黨員身份。但今屆立法會教育界代表葉建源至今寧願保持獨立泛民身份，都唔肯加入民主黨成為黨員。原來並唔係葉建源唔想入黨，而係教協內部近月一直討論未來立法會選舉轉戰直選嘅可能性。既然教協密謀搖身一變成為政黨，當然唔可以畀葉建源再食其他政黨嘅茶飯，唔怪得即使有咁多泛民政黨向葉建源招手，佢都一直守身如玉，唔肯入黨。
自從前立法會議員張文光宣布退休後，教協即時「協商」會長馮偉華接棒出選，舊年仲喺民主黨力勸之下加盟成為普通黨員。之不過人算不如天算，馮偉華臨門一腳因病唔選，要由葉建源替補上場，最後都無驚無險保住教協多年來一直雄霸嘅議席。正當外界以為葉建源會好似其他教協立法會議員咁加入民主黨時，葉建源竟然即時耍手擰頭話絕無此事，選舉翌日仲高調發聲明，話自己唔係民主黨中人，暫時亦無意入黨。
張文光認有此盤算
教協副主席張文光承認，教協正探討有無可能轉戰立法會直選，又證實葉建源短期內唔會重投民主黨。張文光話，雖然教協同民主黨關係密切，但兩者始終屬於唔同政治團體，吸納嘅支持者亦有差別。佢話，如果政府喺未來兩屆立法會選舉全面取消功能組別，而教協又冇人參加直選，到時都唔知邊個可以繼續幫班老師發聲。正因為咁，教協中人要考慮教協變身政治組織對會員嘅影響，暫時都唔可以輕舉妄動。葉建源入咗立法會唔夠四個月已經成為風頭躉，幾個泛民政黨都開出豐厚條件力邀加盟，但佢仍然毫不心動，原來係另有盤算。
八萬會員 擁高民意
睇番數字，教協現有教師會員超過八萬人，係擁有最多會員嘅民主派組織。香港研究協會上月發表政治團體支持度調查時，首次將教協納入當係政治團體，教協仲以二點八分排名第三，成績算係唔錯。喺咁高民意支持下，如果教協真係決定轉戰直選，相信都會得到一定支持。