中環出更：兩個譚校長同台獻唱

「政壇技安」被取笑

當晚唔少名人校友排住隊獻技，剛退休衞生防護中心總監曾浩輝與音樂劇及電影作曲家高世章先後露兩手彈鋼琴，前中文大學醫學院院長鍾尚志吹色士風，仲有香港大學社會醫學系系主任梁卓偉（Gabriel）壓軸登場客席指揮，期間其前上司、前食物及衞生局局長周一嶽更被暗寸。

Gabriel一踏上台板，就指揮華仁一家交響樂團，為阿倫伴奏一曲《忘不了你》。呢首歌之前畀有「政壇技安」之稱嘅周一嶽唱一唱，就喺網上紅透半邊天，隻歌嘅原唱者譚校長真係多得佢唔少，譚校長笑言，「我知道周局長都唱過我呢隻歌，不過佢就唱得比較『別樹一格』啲！」

陳曦齡盛裝出場，同華仁學生傾力獻唱。	鍾尚志（左）同張漢傑（右）為母校籌款，出錢又出力。	謝凌潔貞（左起）與王榮珍、黃鴻超一齊入場。（葉華英攝）

音樂會先由一眾校友高唱《皇后大道東》揭開序幕，接住前港交所董事、華仁一家基金會副主席方俠、基金會發起人兼德祥地產主席張漢傑（Edwin）、名醫陳曦齡（Helen）等輪流開金口獻唱名曲。Helen話，佢自己當然冇讀過男校華仁，但佢生命中最重要嘅三個男性，即係老公謝德富同兩個囝囝天承及天澤，都係讀華仁出身，而老公一家九兄弟姊妹中，有七個都係華仁仔，所以佢一家對華仁感情特別深厚。

曾浩輝原來彈琴造詣頗深。

華仁一家交響樂團奏出一曲《忘不了你》，由梁卓偉指揮。

華仁籌款 官商齊撐

方俠喺○四年嘅音樂會上，慷慨捐款七十萬元予母校，今次「加碼」捐過百萬元。Edwin笑言，呢啲唔係捐款，而係「畀家用」，因為母校係佢哋嘅家。當晚唔少官商名人都有嚟捧場，教育局常秘謝凌潔貞同公務員事務局常秘黃鴻超、創新科技署署長王榮珍夫婦孖住入場，太子珠寶鐘錶主席鄧鉅明就同姊夫朱繼陶前後腳到埗，仲有立法會議員莫乃光單拖現身。

卓妮