開講有話，冇咁大個頭，唔好戴咁大頂帽。前朝曾蔭權政府好大喜功，聲稱要發展所謂六大產業，其中一大係教育喎，點知搞嚟搞去得個吉，毫無寸進不特止，仲烏龍百出，亂象多多添。
話說浸會大學因為校舍唔夠用，一直爭取將前專業教育學院李惠利分校地皮作大學永久用途，解決宿舍不足等問題。可惜神女有心，襄王無夢，規劃署完全當浸大冇到，竟然建議城規會將有關地皮改為興建豪宅，理由係住宅用地不足，目前有迫切建屋需要喎。
嗱，本來係教學用地，當局一聲唔該就改為住宅用地，唔怪得浸大表示震驚，第一時間發表聲明抗議。教育局局長吳克儉就話嘞，香港地方矜貴，地皮資源缺乏，需要平衡各方面需要以作規劃。唉，既然知道香港地皮資源缺乏，就唔好亂咁吹水話要發展乜嘢教育產業喇！
話時話，何止浸大唔夠地方用，其他大學都唔好得幾多嘅咋。呢，城市大學喺沙田小瀝源一幢工廈開設逾二萬平方呎嘅圖書館分館已經長達十年，曾容許師生到該處借書同還書，後來知道有關安排可能違反大廈公契，先至停止借書服務，改為網上預訂咋。規劃署證實，該工廈只能作商貿用途，唔可以改為圖書館，城規會從未收到城大嘅申請，就算收到申請亦唔會批准咁話。
有頭髮邊個想做瘌痢吖，如果大學夠地方用，就唔使左度右度，連工廈都改為圖書館喇。講到底，巧婦難為無米之炊，土地唔夠，硬件不足，所謂教育產業根本就係吹水唔抹嘴。不過咁，貴族學校又唔同講法嘞，英國哈羅學校來港建校，除咗獲准以一千元賤價租用市值十四億元嘅屯門海景靚地，更加獲前朝貪曾政府批出二億七千幾萬元免息貸款，作為興建校舍之用。正所謂，同人唔同命，同遮唔同柄，本地大學資源短缺，校舍擠迫，當局闊佬懶理，而外國貴族學校嚟港建校牟利，當局就出地出錢，港產官僚親疏有別，崇洋媚外，十足十係現代版嘅慈禧太后。
講到教育產業，港府最叻就係准許大學濫開副學士課程，成為搵錢之道。早前嶺南大學旗下兩間學院被踢爆唯利是圖，招收副學士學生比舊年多一點八倍，搞到要借用毗鄰街市嘅商場做教學中心，成為教育界嘅大笑話。你話喇，大學究竟係培育人才，定係做生意吖？正如立法會議員話齋，貪曾盲目將教育產業化，令教育質素每況愈下，簡直係誤人子弟，禍港殃民！