政情：落力唱聖誕歌 鄭慕智籌款助貧童圓夢
有「公職王」之稱嘅鄭慕智（Moses）最近為佢出任主席嘅民間慈善團體「兒童發展配對基金」籌款，喺聖誕頌歌節籌款活動上連唱六場，尋日仲喺尖沙咀文化中心露天廣場唱足六個鐘添。Moses咁落力為班小朋友籌款，原來同佢「少年時代的煩惱」有關。究竟係咩煩惱？咪就係想到英國留學冇錢去囉！佢話希望活動籌到多啲錢，幫到多啲小朋友實現夢想咁話。
中氣十足 全靠練習
「兒童發展配對基金」今個月搞咗個一連十七日嘅聖誕頌歌節籌款活動，親力親為嘅Moses就唱足六場，尋日嘅活動閉幕禮佢仲由上午十一點開始唱到下午五點。除咗唱一般聖誕歌外，Moses仲唱咗首歌叫《開心過聖誕》，雖然呢首都係聖誕歌，但就係石壁監獄在囚人士為支持個籌款活動而編寫嘅，所以佢就特登唱畀大家聽。
Moses唱歌中氣十足，皆因佢平時得閒都有上堂練習，加上由細到大都有參加教會唱詩班，所以絕不欺場。不過，Moses就話其實自己唱歌唔係咁叻，全靠搞氣氛搭夠，真係謙虛。