已退休一個多月嘅消費者委員會前總幹事劉燕卿（Connie），似乎仍未習慣退休生活，佢尋日技癢主動打電話到電台節目，就近日鬧得熱烘烘嘅問題食油發表意見。人哋時光倒流七十年，Connie就時光倒流三十六年，重提消委會《選擇》月刊創刊號時已就食用油進行測試，分析當時嘅花生油是否百分百純正，同埋有冇含有黃菊霉素等污染物，慨嘆估唔到時至今日仍出現問題食油。
Connie話，消委會一直有跟進食油安全問題，好似最近佢退休前出版嘅一期月刊中，就檢查咗橄欖油嘅成分。佢又話，市民只能靠食物標籤了解食物嘅成分，對製作過程毫不知情，認為食物內含致癌物係可避免嘅問題，相信政府有能力做好監管，否則會惹來世界各國嘩然，影響香港整體信譽喎。估唔到Connie退休後仍關心消費者權益，但更加估唔到嘅係，中港融合會連兩地食油都溶埋一齊！