政情：搞邊瓣衰邊瓣 「吳得掂」連煮餸都唔掂
教育局局長吳克儉尋晚已搭飛機到澳洲展開聖誕之旅，但佢上機前就要連趕三場公開活動，朝早先出席完北區花鳥蟲魚展覽，然後中午出席沙田馬場仁濟盃賽，之後又趕去兒童發展配對基金活動。雖然吳克儉負責教育範疇，但佢去到馬場都忍唔住手投注咗頭兩場賽事，每場投注十元，但運氣認真麻麻，輸晒收場，估唔到佢未搞掂浸會大學想發展嘅九龍塘聯福道地皮，就先幫馬會鋪草皮。
靠大廚收拾殘局
講到去澳洲旅行，吳克儉就滔滔不絕，佢話去過澳洲好多次，今次會同太太先去悉尼，雖然仲未安排詳細行程，但佢就已經決定咗一定要去食海鮮，而且首選係鮑魚，仲話上湯煮鮑魚先至最鮮味喎。吳克儉又自爆，試過喺當地一間可以即買即煮海鮮嘅餐廳，自己落手煮鮑魚，點知就煮過龍，隻鮑魚煮到「乾憎憎」，仲搞到畀大廚鬧佢唔識煮，嘥晒啲材料，最後惟有企埋一邊等大廚出馬咁話。
吳克儉之前就德育及國民教育風波搞到一鑊泡，就連煮自己心愛嘅鮑魚都煮禍晒，真係搞邊瓣就衰邊瓣，唔怪得被人改花名叫「吳得掂」嘞！