政情：范國威 蔣麗芸 投訴惡鄰
社民連梁國雄（長毛）同人民力量三子黃毓民、陳偉業及陳志全，出名聲大夾惡，早前編排議員座位時，多名建制派議員都拒絕坐喺佢哋隔籬。立法會開咗會約三個月，依家連同屬激進泛民主派嘅新民主同盟范國威（Gary）及同樣出名大聲嘅民建聯副主席蔣麗芸（Ann姐），都投訴受到佢哋滋擾，後者更加密謀搵黨友調位添！
Gary喺立法會大會坐喺長毛同人力三子中間，本來大家都係激進泛民，同樣以批評建制派同民主黨為樂，應該可以做個好鄰居，但開會三個多月來，Gary都話就嚟頂唔順，覺得佢班鄰居真係太嘈！佢透露，人力三子發言同示威時大聲唔在講，即使喺其他議員發言時，佢哋亦經常私下密斟，好似開緊小組會議咁，令佢難以集中精神。
范居高臨下 無意調位
至於長毛就更加有事冇事都無啦啦大叫，又不時自說自話品評主席曾鈺成嘅主持會議手法，加上長毛開會一般都冇備課，又經常行出行入，每次返到位就會問「個會開到邊呀？」、「應該投咩票呀？」，當正Gary係義務秘書咁。Gary又話，除咗佢哋四個，同樣坐佢隔籬嘅中華廠商聯合會代表林大輝講嘢都好大聲，令佢開親會都好似聽緊五重奏咁。
不過，Gary話依家呢個正中後排座位亦有一定好處，就係可以居高臨下，望晒其他泛民同建制派議員嘅一舉一動，變相幫佢呢位立法會新丁免費密集補課，例如早前民主黨黃碧雲投錯票，佢就目睹整個過程，所以佢暫時無意調位。
Ann想換位 黨友唔制
至於因多次爆咪痛斥泛民而成名嘅Ann姐，喺財務委員會獲編排坐喺長毛隔籬。早前嘅長者生活津貼拉布戰，「嫉惡如仇」嘅Ann姐就對長毛嘅一舉一動好唔抵得，成日想發炮鬧長毛，但佢深知自己一開聲，就等同幫咗長毛拉布。早前佢問過黨友梁志祥可唔可以調位，但對方咿咿哦哦，明顯亦係怕咗長毛。睇嚟Ann姐想接替黨友劉江華擔任民建聯重炮手，除咗夠大聲之外，仲要學吓點樣收放自如，唔好咁易被人激嬲。