政情：梁太逛花展 掛住CY
特首梁振英（CY）夫人唐青儀趁老公上京述職不甘寂寞，公然拈花惹草？大家咪誤會，梁氏伉儷出晒名係愛花之人，卓妮尋日就見梁太獨自出席北區花鳥蟲魚展覽開幕禮。只見寒氣凜冽下，梁太喺頒獎台上做咗近句鐘「拍手機器」依然面不改容，遊覽會場時見到展覽冠軍作品，更愛不釋手要用手機影低，話要返去畀CY羨慕吓喎！
近期衣着品味大躍進嘅梁太，以一身啡色唐裝配西裝外套現身展覽，同在場嘅盆栽展品襯到絕。不過，尋日天寒地凍，難為台上嘅梁太由剪綵、到頒發紀念品同獎項，「食風」食咗近句鐘都面不改容，全程落力做好「拍手機器」嘅角色。
冠軍盆栽最得歡心
頒完獎，梁太又花好多時間遊覽展覽會場，而且對場內參展盆栽好有興趣，其中「特首夫人盃」冠軍作品、來自菲律賓嘅「拖鞋蘭」就最得梁太歡心，佢更忍唔住攞起手機拍低作品，話「影低佢，等CY羨慕吓！」去花展都不忘大晒恩愛。梁太呢頭影完相，嗰頭就有好多市民排隊要求與她合照，梁太當然好識做，充當人肉布景板任影唔嬲，盡顯親民的作風！