中環出更：李文斌開口中 電業大亨捧盃
沙田馬場尋日熱鬧到爆，城中名流及馬主都趁聖誕節前，同至親老友齊入場輕鬆吓。仁濟醫院主席鄭承隆及董事局一眾高層亦齊齊入場支持「仁濟盃賽」。咁啱得咁蹺，前仁濟主席兼理文造紙董事總經理李文斌（Edmond）哥哥李文恩嘅外父、電業大亨郭燦耀名下嘅「旗幟鮮明」贏得盃賽。賽前Edmond笑稱要喺鄭承隆手中捧走獎盃，估唔到畀佢開口中，難怪佢開心到飛起。
現身嘅仁濟高層仲有副主席嚴徐玉珊、蘇陳偉香及鄭承峰等人，嚴太老公兼電子業商會副會長嚴玉麟（Stanley）、大仔嚴子杰、細仔Jeffrey及千金Carmen都有去撐場。Stanley愛駒「電子福星」喺第五場出戰，可惜三甲不入，由該場賠率高達九十一倍嘅冷馬勝出。不過，嚴家上下喺馬匹衝線後依然尖叫不已，原來係Jeffrey買中頭馬，一注五十元獨贏得四千多元，認真有眼光。
副主席蘇陳偉香囝囝名下愛駒亦贏得頭馬，近八十萬元獎金袋袋平安。蘇太老公蘇啟聲同Edmond爸爸李運強分屬老友，帶挈落重注嘅李運強贏番筆，李運強開心到宣布派五千元畀入場玩嘅廿位內地員工，蘇啟聲就玩配對，將獎金加碼至一萬元。
胡家驃好心有好報
尋日風頭最勁嘅莫過於大慈善家胡寶星公子胡家驃（Jackson），佢連拉兩場頭馬，包括胡家兄弟共同擁有嘅「喜蓮芳芬」及團體馬「勝風」，兩場獎金合共近一百萬元。不過獎金多少係其次，最令Jackson開心嘅係兩匹駿駒都係首次贏頭馬。最近Jackson捐助清華大學興建全亞洲最大嘅圖書館，都話好心有好報，係真o架！
卓妮