有樓收租真係好鬼死過癮o架，事關香港最昂貴就係土地，最值租就係樓房，假如你行運行到落腳趾尾，名下有一大堆物業收租，真係下半世敲跛腳都唔使憂。
私人住宅當然可以放租賺錢啦，其實經營賓館一樣豬籠入水。無他嘅，國內同胞以及外國遊客源源不絕入境觀光，酒店呀，賓館呀，客棧呀，甚至連度假中心以及露營範圍都客似雲來。喺咁嘅情況之下，少不免有人心存僥倖，膽博膽無牌營業嘞，貪嘅就係旅客宿一宵嘅過夜費。
本報記者發現，有賓館喺申請牌照期間涉嫌走法律罅，以月租形式將賓館房間租畀旅行社，明目張膽接待旅客圖利。點解話以月租形式出租賓館係走法律罅呢？原來根據《旅館業條例》規定，出租少於連續二十八日就必須領牌接受監管，若然以月租形式將房間租畀旅行社，咁就無牌都可以經營嘞。
今年四月，位於尖沙咀彌敦道嘅金冠大廈四樓全層改建為無牌賓館，事隔半年一直營業，政府巡查毫無寸進，未有採取任何檢控行動。記者日前再上去視察啦，發現無牌賓館已經命名為加洲酒店，內部裝修比不少有牌賓館更加華麗。
無牌還無牌，原來加洲酒店負責人都滿肚苦水，佢哋話已經投資千萬元裝修，但去年十二月申請賓館牌照，政府拖延至今仍未發牌，令佢哋大失預算，被迫以四折價錢每間房月租約一萬元畀內地旅行社。負責人仲埋怨：「又話唔夠房租畀旅客，但啲（審批）程序就鬼咁耐，係政府逼我犯法，我都想安分守己！」
即係咁，民政事務總署轄下牌照事務處存在兩大問題。首先，如果人哋正正當當投資做生意，因乜事幹遲遲都唔發牌呀？香港成日都話唔夠房間招呼旅客，有人開賓館都算得上助旅遊業一臂之力吖，阻住地球轉有損經濟利益喎。其次，如果遲遲唔發牌嘅原因係樓宇結構或者防火安全未達標，牌照事務處就唔應該又盲又聾咁任人無牌經營啦，唔拉人封舖都要重重罰款啦，點可以隨便畀人走法律罅o架！
正如旅遊業議會總幹事董耀中話齋，對於無牌賓館走法律罅安排內地旅客入住，應該設法堵塞漏洞，當局亦應加快賓館發牌程序，鼓勵賓館領牌。
講真吖，特區政府嘅執法權力已經攞正牌，經過七月一日宣誓就職之後，梁振英領導嘅管治班子名正言順有牌營業，點解執法起上嚟竟然唔湯唔水嘅呢？咁嘞，如果有牌執法也枉然，牌照事務處甚至民政事務總署自己吊銷自己牌照啦！