紅酒令人着迷，好多人都鍾意收藏靚紅酒，而且仲係欣賞多過飲，無他嘅，靚酒買少見少，飲一支就少一支。
就好似富豪「有錢人」咁，佢素來對美酒佳餚嘅要求都好高，特別鍾情一啲罕有度極高嘅陳年佳釀，尤其一九六六年嘅意大利酒王Sassicaia，事關佢對呢個年份嘅紅酒有特別喜好。
為咗歎得出色，「有錢人」不惜聘請一位月薪高達七、八萬元嘅專才，專門幫佢飛去唔同國家搜購名酒佳餚，運返港畀佢慢慢歎，認真識飲識食。
可能大家會覺得幫「有錢人」搵吓靚酒就有咁高人工，看似好易賺，但原來呢份工都唔係咁易做。事關曾經有一位員工只係因為搵唔到「有錢人」鍾意嘅嗰款六六年紅酒王，就被炒魷魚。
所以「有錢人」出得八萬元人工係有原因嘅，呢啲陳年佳釀可謂世界珍品，就算今個月好彩畀你搵得到，都唔知下個月仲搵唔搵到，每月都要膽戰心驚咁工作，加上要經常坐飛機舟車勞頓，真係賺埋啲錢都補唔番。其實同等價值可以買到好多其他靚嘅紅酒，但本身有特殊愛好或情意結就冇得好講喇。