出爐港區全國人大代表兼行政會議成員陳智思（Bernard）出晒名係政壇「公職王」，但早前先放風話想減少公職數目，但尋日又無端端翻兜做社會服務聯會（社聯）主席呢個「筍位」，戴上道德光環鋪路選特首嘅傳聞，似乎唔係空穴來風喎！
百足咁多爪嘅Bernard，早前以健康同家族生意為由，婉拒特首梁振英（CY）邀請佢加入問責團隊，同時揚言減少公職數目。
不過，Bernard放棄公務職銜好識揀，宣布唔再續任古物諮詢委員會主席時走都走唔切，另一邊廂就攬住社聯主席呢個虛位十年唔放，去年降格出任社聯副主席嘅佢，尋日更翻兜升任該會主席，真係唔知佢想點。
不過，好草都唔怕回頭吃，相信Bernard係深明依家嘅市民對特首要求好高，依家佢卸任具爭議性而且吃力不討好嘅古諮會主席，再戴番社聯主席呢頂道德光環，可以樹立為基層發聲嘅形象，爭取全港嘅市民支持。所以話，如果明日世界最後冇末日的話，Bernard會「更上一層樓」，都唔可以話絕對唔係冇可能o架！