政情：剪靚髮迎聖誕 吳克儉校啱時間外遊
教育局局長吳克儉近日剪咗個靚髮迎聖誕，望落去清新啲又精神咗，但天文台話平安夜嘅氣溫或會降至十一度，有望成為自有紀錄以來第八凍嘅平安夜，唔知吳局長嘅清爽髮型又有幾耐寒呢？不過唔緊要，事關吳局長嚟梗將會放假去澳洲過一個暖笠笠嘅聖誕，幾清爽都應該唔會冷親啦！
飛去澳洲一星期
吳局長做官近半年，一場國民教育風波令佢搖身成為火辣當紅局長之一，難得冷鋒南下，但佢就好似嫌平時「熱廚房」唔夠熱咁，放假都要追住夏天，飛去澳洲過聖誕。佢話嚟梗聖誕會同親友去澳洲一星期，但澳洲咁大，南北溫差都唔細，究竟佢係去邊呢？吳局長只係話會同啲親友四圍玩吓，去邊度就保持神秘，莫非佢怕被澳洲留學生狙擊？
吳局長揀聖誕放假，都可以話係睇準時機，事關特首梁振英（CY）今日上京述職，到一月一日又再有元旦大遊行，吳局長出埠豈不是可以避風頭？不過，吳局長就話：「咁大家都有放假時間o架嘛！」咁咪係囉，大家就唔好針對佢喇。