政情：打白煲呔贈興 徐立之新Look夠搶鏡
平時見到香港大學校長徐立之都係打領呔多，但日前佢出席一個活動時，好罕有咁打咗個純白色嘅煲呔，令佢喺一眾嘉賓中顯得特別搶眼。
徐立之話，自己最近先開始打煲呔，但佢戴住嘅白煲呔唔係自己買，而係重返港大執教鞭嘅前特首辦主任梁卓偉（Gabriel）送贈嘅。唔知Gabriel係咪以前見得又污又黑嘅「煲呔」多眼冤，所以送個白色煲呔畀徐校長呢？
聖誕留港去行山
徐立之話，自己平時好少買領呔，事關返大學都有免費校呔使用，使乜特登嘥錢買吖！可能Gabriel就係因為呢個原因，主動送煲呔畀徐校長，幫佢轉吓Look冇咁悶。佢又話，打白色煲呔一向係西方嘅社交禮儀，而佢就特別鍾意喺學術頒獎典禮上使用，夠晒禮儀又夠端莊。
聖誕節將至，徐立之話校務太繁重，所以唔打算外遊，但留港過節一樣有好去處。佢話最近愛上行山，有時上晝開完會時間尚早，就會抽時間去附近行吓山，再沖個涼先返工，個人會特別精神啲。