政情：名人末日「遺願」 最想返屋企
根據古瑪雅文明嘅長曆法（Long Count Calendar），明日就係人類文明結束嘅日子，亦即係坊間所講嘅世界末日。雖然一眾受過高等教育嘅政商界人士都口口聲聲話唔信有世界末日，但呢個日子真係可以話係百年難得一遇，好似六合彩咁一日未開都唔知中唔中，唔知啲名人最想喺世界末日前做啲乜呢？
可能啲立法會議員經常都要開會冇時間陪屋企人，根據非正式統計，好多議員嘅答案都係想同屋企人齊齊做冬過節，靜靜度過人生中最後一日。民建聯鍾樹根對於明日終於唔使開會特別開心，仲話一家三口到時會坐低食飯慶祝冬至，連立法會秘書長陳維安都話：「做冬梗係同屋企人一齊食飯啦！」
之不過，Sony Computer Entertainment香港董事項明生（James）明日就為咗今年嘅亞洲遊戲展同百多個外賓食飯，就算媽咪炮製咗多款好餸，佢都食唔到，所以佢最希望返屋企食飯喎。建築、測量及都市規劃界謝偉銓（Tony）就話，明日佢會去睇牙醫，乜世界末日都仲要睇牙？Tony笑笑口話：「就算末日都要有棚牙陪住我o架！」
黃國健想飛巴西睇森巴舞
工聯會黃國健嘅「遺願」就最有創意，佢話會立即使晒啲錢，即刻飛去巴西睇美女跳森巴舞，實行玩到最後一刻。KK話，好多年前去過巴西旅遊，對當地食物、氣候及風俗情有獨鍾，但遺憾一直冇乜時間再去。政制及內地事務局政治助理陳岳鵬就最無聊，佢希望僥倖生還嘅議員記得投票支持新一份政改方案，咁佢就冇遺憾喎。
向來鍾意飲茅台酒嘅中華廠商聯合會副會長吳永嘉就話，會一次過開晒啲茅台酒珍藏來浸浴，如果最後冇事嘅話，咪飲番晒佢囉！畀佢浸過嘅酒，唔知邊個敢飲呢？至於香港青年聯會副秘書長周沁就話，會喺末日爬上珠穆朗瑪峰世界最高點，代表去到人生最高峰喎！聽完咁多名人講末日，大家覺得邊個最有創意呢？