中環出更：靚仔莫醫生 孤伶伶過聖誕
每逢佳節倍思親，係人都想大時大節呢啲喜慶時刻，有人陪自己度過。不過，著名腫瘤科靚仔醫生莫樹錦日前現身一個活動時就呻話，今個聖誕節要孤伶伶咁過，事關身在加拿大讀書嘅囡囡Ashley，本來打算趁聖誕假返港團聚，但愛女竟然因為掛住拍拖，丟低爸爸話唔返嚟過節，搞到莫醫生好無奈大呻自己做咗「傷心的父親」喎。
囡囡掛住拍拖唔見影
雖然囡囡掛住拍拖，但莫醫生都好開通，並冇因此而一籌莫展，反而為另一件事而高興，就係助養咗第三名兒童。話說佢本身喺尼泊爾已經助養咗兩個小朋友，上月跟某慈善機構第二度到訪當地貧困山區，見到一個輪廓分明、五官精緻嘅小女孩，二話不說就決定助養。加埋一樣身處加國留學嘅細仔，莫醫生總共有五個「仔女」咁多，又點會覺得寂寞呢？
平均每個月要飛外地兩三次公幹嘅莫醫生話，平時坐得太多飛機，今個聖誕想留港抖抖。坊間盛傳世界末日論，莫醫生話唔會相信，就算有佢都係以平常心咁過，依家已經過得心滿意足。咁樂觀，唔怪得佢望落年輕啲啦！