政情：擺老竇上枱 怪醫冇返立會投票
立法會尋日辯論對特首梁振英（CY）嘅不信任動議，醫學界梁家騮（怪醫）幾日前採取拖字訣，話到投票嗰刻先會決定投票意向。尋日佢再被記者追問到底會點投，佢就繼續帶記者遊花園，跟手仲擺埋老竇上枱，話尋日係佢老竇九十三歲生日，夜晚要同屋企人去旺角食飯慶祝老竇生日。結果佢最後都冇返立法會投票。
與父親食飯慶生
怪醫一向行蹤飄忽，除咗開會時成日搵唔到佢外，佢嘅投票意向有時都會與眾不同，明明建制派投反對票嘅議案，佢就會別樹一格投贊成票，所以大家都好想知道佢今次點樣對待CY嘅不信任動議，點知佢話要同老竇慶祝生日。不過，怪醫就話冇準備生日禮物，覺得一齊食飯就係最大嘅禮物喎。
怪醫喺六點半離開立法會時，仲話要返屋企接埋老婆一齊去，對於會否趕返立法會投票，佢用「睇吓點先」繼續擋駕，臨走都要神秘過人，結果最後都冇現身立法會投票。講起怪醫腹大便便嘅老婆，怪醫透露太太將喺年尾剖腹生產，連同年初誕下嘅龍仔，到時一家人齊齊開心過新年。