政情：飯碗要緊 徐英偉請爆假逼停學
民政事務局政治助理徐英偉（Caspar）喺上海復旦大學讀緊四年制公共政策博士，佢話為咗完成個學位，一個禮拜要請一日假，通常係星期三夜晚飛去上海返學，第二日夜晚趕返香港做嘢，Caspar就係咁每個星期喺上海虹橋、浦東兩個機場輪流搭飛機，有時仲會因為趕時間而去錯機場，搞到大失預算。
為囝囝頻撲奶粉
返工始終係Caspar嘅正職，佢今個學期已經因為要返學而請爆假，下個學期要被迫停學半年。Caspar話學校批准佢喺香港一路睇書一路寫論文，之後將啲功課電郵返學校。佢話遙距上堂雖然冇人睇住可以好輕鬆，但都希望自己唔好偷懶可以準時完成課程喎。
Caspar除咗忙於返學，喺香港嘅時候仲忙於撲奶粉。佢住喺九龍塘，平時佢哋通常去開地鐵站買奶粉，但唔知點解啲奶粉周不時會畀內地客買晒，搞到佢成日都買唔到奶粉同尿片畀囝囝。為咗令囝囝唔使餓親，佢同老婆特登分頭分區格價搵奶粉，最後終於喺灣仔發現囝囝平時食開嘅牌子，仲發現灣仔啲奶粉平過石硤尾十幾蚊。