政情:怕屁股打藤 葉劉愛女唔去星洲

新民黨主席葉劉淑儀已故嘅爸爸係新加坡人,所以葉太每年都會過新加坡拜爸爸,今年聖誕節都唔例外,不過今次佢特登帶埋愛女葉榮欣(Cynthia)去,原來Cynthia咁多年都未去過新加坡,係因為一個童年陰影所致。

Cynthia自細聽聞新加坡法例好嚴,如果當眾食香口膠,或者去廁所唔記得沖水,都會畀警察捉去打藤,而且仲要係打屁股嗰種。而咁啱Cynthia最鍾意食香口膠,所以就係呢個童年陰影,搞到佢咁多年來都冇去過新加坡拜外公。

葉太話事隔咗咁多年,如今Cynthia都已經咁大個女,按道理都應該帶囡囡拜吓外公。

當地龕位 向上發展

葉太講開又講,話近年發覺新加坡嘅骨灰龕問題同香港同樣嚴重,但新加坡容許龕位向上發展,所以佢爸爸個龕位近年愈擺愈高,搞到佢每次去拜爸爸時都要行多幾級樓梯,不過佢覺得高空發展呢招,香港政府都可以諗吓。

至於葉太嘅爸爸點解係新加坡人呢?葉太話皆因佢爺爺自細就畀人賣咗去新加坡,嗰一代嘅中國人,真係有好多不足為外人道嘅辛酸,不過葉太喺香港出世,係地道嘅香港人。

第一手消息請下載on.cc東方互動iPhone/iPad/Android/Windows Phone Apps