政情：長毛 魔童末日救星？
熱爆話題「世界末日」仲有唔夠十日就來臨，香港一個網絡調查就選咗來自唔同界別嘅「末日救世者」，希望有英雄挺身而出打救地球。政壇界別奪冠嘅「長毛」梁國雄話，自己冇能力打救地球喇，但就最想打救特首梁振英（CY）。至於「爆冷」當選娛樂圈冠軍嘅城市電訊主席王維基（魔童），唔知係咪因為政府發放免費電視牌照遙遙無期，寧願選擇喺世界末日陪囝囝打遊戲機，都唔去拯救人類喎。
長毛最想打救CY
雖然長毛獲選為政壇「末日救世者」，但佢之前喺立法會財務委員會「拉布」力爭可以取消長者生活津貼嘅資產審查行動，技不如人被政府成功「剪布」而失敗告終，所以佢都自愧話：「連老人家都救唔到，點去拯救地球呀！」不過，佢最想喺世界末日打救CY，等佢見唔到世界末日喎。長毛仲話，如果真係有世界末日，佢會選擇環首死刑，因為唔使三十秒就死得，認真瀟灑。
問番長毛點睇市民咁支持佢，佢就話可能係自己成日着住印有哲古華拉嘜頭嘅衫，令市民覺得佢有拯救人民於水深火熱嘅感覺。不過，長毛叫市民千祈唔好學佢，因為佢成日唔換衫，好鬼污糟邋遢喎。至於力壓眾多天王天后嘅魔童，可能受到政府遲遲唔發免費電視牌照影響，對拯救地球無晒心機，淨係話最近公事太忙，無時間陪囝囝打機，所以佢希望趁世界末日陪吓囝囝。
七成港人 唔怕末日
雖然長毛同魔童都有唔同原因拒絕做「末日救世者」，但就算佢哋肯做，分分鐘最後變成「救世神棍」。事關一個以為好正義玩拉布，但其實阻住幾十萬長者攞生活津貼，另一個就未攞到免費電視牌就猛燒銀紙，連自己都打救唔到，點打救世人呢？
另外，調查續發現，近七成香港人唔信嗰日係世界末日，亦都唔怕世界末日，而最想喺世界末日來臨前做嘅事係環遊世界、同男神或女神表白、仲有打爆晒啲遊戲。