中環出更：吳文華退休四圍「傳授武功」
唔經唔覺已經退咗休五個幾月嘅前立法會秘書長吳文華（Pauline），日前現身一個活動，見佢精神爽利，成個人好似年輕咗咁，佢話剛剛去完多個地方旅行，叉夠電先返港，加上依家每日都可以瞓到足至起身，梗係生猛啦！佢話現時忙於到各大機構團體「傳授武功」，教導年輕人文書技巧及會議流程，笑稱自己好似個農夫咁到處播種喎。
Pauline過去多月已經遊遍東南亞、加拿大、澳洲、新西蘭及台灣各地，吃喝玩樂鬆一鬆之餘，仲以崇德社東南亞代表嘅身份，四出推動婦女權益，幾乎冇一刻停低過，所以隨身拖住嘅旅行篋，身上面總會帶住一包旅行用品套裝。
佢坦言好享受做義工，特別係教育下一代，所以喺埋首寫書之外，亦瞓身做義工。
明年返立會兼職
早已視立法會為第二個家嘅Pauline之前預告過，將會重返立法會幫手，前晚佢就確認明年一月正式開始兼職，雖然工作性質仲未傾掂，但可以繼續做自己喜愛嘅工作，相信做乜都咁高興啦。照咁睇，佢咪好有機會同現任秘書長陳維安齊齊拍住上囉！