中環出更：葛珮帆絕世好家姐
如果大家覺得喺工作同家庭之間難以分身，想尋求婚姻家庭治療專業意見，不妨問吓民建聯立法會議員葛珮帆（EQ）嘅意見啦！因為EQ個婚姻與家庭治療碩士並唔係「死讀書」讀返嚟，其實仲有生活實踐o架，EQ除咗要做一個好老婆外，尋日卓妮仲親歷佢做一個好家姐，如果唔係，佢又點會喺立法會開開吓會，蛇咗去中環買個煲做聖誕禮物氹妹妹開心吖！
為妹買煲 會都唔開
尋日下午四點鐘，正當立法會開會期間，卓妮就喺中環太子大廈某間賣高級廚具嘅店舖，發現咗一個熟悉嘅身形，原來係EQ喺度買緊煲。當EQ畀完錢後，竟然兩手揈揈走出店舖，卓妮於是上前問佢點解畀完錢都冇收穫啦，EQ就話稍後搵人幫佢提貨喎。點知五分鐘後，卓妮竟然見到EQ折返舖頭攞番個煲，然後話要趕住返立法會開會。原來佢之前離開店舖只係去廁所啫，莫非佢怕被人話佢蛇王唔開會，所以要避開卓妮？
不過，EQ蛇王原來係有苦衷嘅，話說佢個妹一直都好想買個煲食芝士火鍋，可惜一煲難尋，搵盡港九都搵唔到一個啱心水嘅煲，所以可以想像，當EQ尋日三點幾鐘收到朋友短訊話幫佢搵到個煲時，姊妹情深嘅EQ會是如此雀躍。EQ話，原本諗住叫同事去買煲，可惜無論EQ點形容，同事們都一頭霧水唔知佢講咩，幻想唔到呢個一度被懷疑絕迹香港嘅煲係咩樣。
結果，EQ因為朋友一句「只剩一個，賣晒就無」最後通牒，本着一顆愛妹嘅心，好家姐惟有自己出馬，毅然步出立法會議事廳差唔多二十分鐘，出咗去中環買埋最後一個煲。最重要嘅係，EQ花完一千多元買個煲，淨係知個煲係歐洲貨，連個煲係咩牌子，貴在啲咩都唔知，所以話呢，EQ真係個好家姐，呢個婚姻與家庭治療碩士絕非浪得虛名！
卓妮