店舖擺貨阻街無路行
荃灣大河道平日熙來攘往，加上店舖阻街問題嚴重，令途人寸步難行。周先生稱，上址有店舖長期將貨物擺放店外行人路，令本已水洩不通的街道「逼上加逼」，「啲貨起碼佔咗條路幾米咁闊，依家仲愈霸愈出，呢度又多人行，但係食環署就管都唔管！」食物環境衞生署發言人表示，如發現店舖於行人路擺放貨物造成阻塞，會發出口頭警告；一旦警告無效，會採取拘控行動。該署於過去一年接獲二十宗上址有關投訴，及作出四十三宗檢控，日後會繼續留意相關情況，採取適當行動。
「一年檢控咁多次都冇改善，（貨物）收埋兩日又攞返出嚟，好心食環署諗吓計仔啦！」周先生認為單以檢控未能有效打擊上址店舖貨物阻街情況，要求當局加重罰則以收阻嚇作用，並檢討現行法例，徹底改善問題。