安全島頻被撞途人危險

「嗰度人來人往，我見過成盞燈畀車撞到彈開，容咩易飛落我哋度o架，點解政府次次都要等死咗人先肯做嘢？」歐女士不時行經亞皆老街與洗衣街交界，已多次目睹安全島指示燈被車輛撞至飛脫，懷疑指示燈位置設置不當，易遭車輛碰撞。「初頭諗可能係有司機揸車唔識就位，但一次係咁，冇理由次次都係咁，又唔見其他燈成日畀人撞甩？」歐女士曾多次向運輸署投訴，不滿問題未獲正視。

本報轉介 即派員視察

路政署發言人表示，由去年年初至今，上址安全島指示燈共錄得七宗損毀紀錄，最近一宗發生於十月五日。至於更換一盞安全島指示燈需費約港幣一千一百元。運輸署發言人回應查詢時稱，接獲本報轉介後曾派員實地視察，並審視該安全島指示燈的設計圖則，認為設計符合安全標準，並已充分考慮車輛行車及轉向位置。發言人又說，由於現場路段交通繁忙，在現有環境因素限制下，有關安全島指示燈已被設置在適當位置。

洗衣街與亞皆老街交界人來人往，一旦發生意外後果嚴重。

亞皆老街交界擠滿車輛，但小巴依然強行轉入，幾乎撞及安全島指示燈（紅圈示）。

盞指示燈「整好又撞」

不過，當區區議員仇振輝則炮轟運輸署「死不悔改」，未有採取實際改善行動，「呢個問題好嚴重，盞指示燈整好又撞、撞完又整，反映過好多次，但係佢（運輸署）次次都用專家拋我哋，話個『專家』都話冇問題，我哋點夠佢講？」仇認為指示燈屢次被撞並非巧合，促運輸署重新考慮指示燈設置位置，避免意外再生。

市民心聲 陳先生：「盞燈應該整番入啲，咁啲車都易轉啲、唔使咁易撞到。」

陳小姐：「呢度人流咁多，盞燈咁擺法好危險，運輸署應該盡快改善。」

「亞皆老街洗衣街交界個位成日都好塞車，又多大巴轉彎，有時咁啱有車喺街口停車上、落客，後面個司機又心急夾硬轉彎，咁就會撞埋去！」港九新界公共小型巴士聯合總商會主席梁雄指，不少車輛在黃燈亮起時仍然前行並轉入亞皆老街，加上交界位畫有不准停留的黃色方格標誌，車輛便強行「塞」入已經塞車的街口，好易碰撞到安全島指示燈。梁指除可「移入啲」指示燈外，警方亦可派員站崗防止車輛「衝燈尾」轉入亞皆老街。

記者：阮佩君

攝影：黃芷君、馮國豪