免費病床如虛設 衞生官僚話之你

唔係功夫茶亂噏，立法會帳目委員會尋日繼續聆訊審計報告有關私院嘅批地問題，議員圍轟當局監管私院不力，搞到免費病床使用率長期偏低，有等於冇。點知衞生署署長陳漢儀話喎，衞生署二十年前喺醫院事務處手上接管私家醫院，一直唔知有呢項條款，所以一直冇執行，直到審計報告踢爆先至如夢初醒咋！

喂，身為監管部門，竟然乜都唔知，有冇離譜啲吖。咁搞法，以後出咗乜嘢問題，監管部門係咪一句唔知就可以蒙混過關呀？功夫茶好想問問陳漢儀，閣下知唔知自己出幾多錢糧呀？又知唔知邊日出糧呀？又知唔知係納稅人出糧畀你嘅呢？唉，前朝周一嶽一周一鑊，林秉恩渾渾噩噩，搞到醫療衞生亂七八糟，大家都希望新官上任之後撥亂反正，可惜家陣睇嚟，可能都係換湯不換藥嘅咋。

即係咁，港府免費或低價批地畀私家醫院，私院向市民提供免費同廉價病床，本來係天公地道。可惜吖，當局又冇宣傳，又唔監管，私家醫院利字當頭，梗係側側膊唔多覺啦。結果，私院免費病床唔係使用率長期偏低，形同虛設，就係以種種理由拒絕提供，就算真係有病人咁好彩用到，醫院一樣會喺其他收費拉上補下，埋單一樣咁乸脷。

所以話，糊塗官遇上精甩辮嘅商家，乜嘢騎呢怪事都可能發生。事實上，本港私院幾乎全部用非牟利機構名義得到政府免費或象徵式收費批地，但究竟地皮點用，從來無監無管，最離譜嘅係，港府居然批准其中一間私院將一半地皮改變用途，建成豪宅，賺到盆滿缽滿。你誓神劈願話香港冇官商勾結，都冇人信啦。

話時話，港府敲鑼打鼓發展醫療產業，又話搞自願醫療保險，其實無非推卸公共醫療嘅責任，將病人趕到私家醫院，分明係官醫勾結。再講啦，家陣香港醫護人手嚴重短缺，發展醫療產業只會加劇私院挖角潮，公院人手逃亡，根本就唔可行。雙非問題搞到香港怨聲載道，就係明證。

一句到尾，免費病床如虛設，衞生官僚話之你。唔該衞生官僚打醒十二分精神，好好監管私家醫院，咪再詐傻扮懵度日辰啦！