近年退居內地做電影生意嘅前演藝界名人岑建勳（John），眾所周知係七十年代社運老兵，港英時代曾為爭取中文成為法定語言同反貪污，被港英政府拉咗十三次，早前更絕食支持反國民教育運動添！佢尋日喺電台節目中發炮，除咗批評依家社會有人「肯講唔肯聽」造成社會撕裂外，更揶揄部分後生仔揸住支港英旗遊行，學人緬懷過去根本冇資格咁話。
火氣十足嘅阿John批評，依家有班人對事情立場非此則彼，係咁講自己立場嘅同時，又唔肯聽人哋意見，咁搞法只會造成社會撕裂，形成愈嚟愈強嘅對立面。近期有後生仔揸港英旗遊行宣揚「港獨」，食鹽多過後生仔食米嘅阿John笑言，班細路得嗰廿幾歲，連港英旗同龍獅旗都未識分，有幾認識港英時代嘅香港？根本冇資格學人緬懷過去喎！
不過，阿John覺得年輕人念舊不無道理，雖然佢哋唔知舊時有咩好，但至少知道今日唔及舊時，提醒政府多聽民意，唔好事事一意孤行。
佢更批評中央政策組首席顧問邵善波嘅「政治工具」論簡直係撩交打，只會令社會更撕裂咁話。