政情：譚志源熱烈讚揚劉江華
本報前日率先報道，民建聯副主席劉江華極有可能出任政制及內地事務局副局長，同局長譚志源（Raymond）組成「譚劉配」，自消息曝光後引起政圈熱烈討論，支持同反對聲音都有，尋日連Raymond都罕有開腔講埋一份。雖然Raymond口講唔評論事件，但佢轉頭就大讚劉江華係「好資深嘅政治人才」，無論從政同地區服務等經驗都好充分，讚到對方仲叻過自己咁。
劉江華入政府消息曝光後，當事人一直未有現身說法，就算佢所屬嘅民建聯核心成員，都幾乎統一口徑話問番當事人喎。就喺呢個時候，劉江華嘅疑似未來上司Raymond尋日出席活動時話，不會就揣測性傳聞作評論，但轉頭就如數家珍咁講出劉江華自回歸前已開始做區議員、區域市政局同立法會議員，之後又喺民建聯處理黨務，加上做過行政會議成員直接參與制訂政策工作，所以喺從政、地區等方面經驗都好充分喎。
Raymond之後又話，政治人才喺不同崗位服務，社會係願意看到嘅，至於劉江華嘅去向問題，就希望大家直接去問番當事人喎。話時話，Raymond提早向劉江華派高帽，莫非係為未來雙方「拍住上」推銷政改做好準備？