政情：林秉恩辛苦棟拐杖受勳
「貪曾」前特首曾蔭權爵士貪盡海陸空令全城怒吼，又無視外界對庸官嘅不滿，竟然卸任特首前向任內劣迹斑斑嘅前衞生署署長林秉恩送上銀紫荊星章，完全係「圍威喂」明益自己友。不過，咪以為林秉恩有得獲頒勳章好過癮，事關佢早前曾輕微中風搞到手腳有些少唔協調，尋日出席儀式時都要棟住支拐杖撐吓撐吓咁行路，認真係有苦自己知！
港府尋日舉行授勳儀式，由特首梁振英（CY）負責頒發貪曾嘅授勳名單，查實外界對於貪曾最後一次分餅仔明益自己友嘅名單都好有意見，相反CY就有啲無辜，要硬啃貪曾留低嘅蘇州屎，講開有意見嘅人選不得不提「曾朋友」林秉恩，佢竟然趕上尾班車獲得銀紫荊星章，實在係令人側目。
事實上，早前中風嘅林秉恩都對呢個勳章好重視，尋日親自到禮賓府領取呢個「餅仔」，當準備離開禮賓府到草地時，佢先要由身邊朋友輕扶步出門檻，然後撐住拐杖一拐一拐走落樓梯，到達草地時又搵到其他曾朋友合照疑緬懷一番。話時話，林秉恩早前因中風令手腳有些少唔協調係公開秘密，貪曾畀個勳章佢，或多或少係愛佢變成害佢，認真無好帶挈！