政情：長津過關記個個好戲

首先得到呢齣戲嘅「最佳導演」獎嘅肯定非小肥張莫屬。小肥張臨開會前先向財委會主席張宇人（Tommy）遞交佢口中嘅補充文件，搞到財委會用咗成個鐘討論份文件究竟係補充文件定係新文件。之後小肥張就「扮委屈」撤銷份舊文件，要求優先處理份「新文件」中嘅開位申請，政府表面上好似輸咗一仗，但原來都係劇情嘅一部分，目的係等工黨主席李卓人有機會再提出中止待續製造混亂，等撥款有機會蒙混過關，所以阿人應奪得「最佳男配角」獎。

另一稱得上係「最佳男配角」嘅Tommy，首先裁定政府提交嘅補充文件係「新文件」，雖然所有程序都要由頭做過，但同時令社民連梁國雄（長毛）提出嘅三百零二項「拉布」動議全部報銷。Tommy之後仲輕描淡寫叫議員就議案發言，當冇人發言時就即時要求舉手表決，仲對不滿嘅長毛爆出一句：「如果你不滿我嘅裁決，你可以去司法覆核」，令全場拍爛手掌。

公民黨提晒水 拉布動議全廢

正當外界以為長毛真係被政府「偷襲」時，有泛民中人就睇唔過眼，爆料話其實有公民黨成員喺財委會審議「新文件」前已經提醒長毛，話之前嘅拉布動議已經變晒廢紙。就憑長毛有心「放水」畀長津撥款喺混亂中過關，仲要因為情緒激動而被玻璃杯鎅親手，精湛嘅演技可以媲美影帝，所以長毛獲得「最佳男主角」可謂實至名歸。

田二少：神的出手

最後，一班「茄哩啡」亦勞苦功高，今次撥款只係有廿四票支持，相信泛民同工聯會一定明白，如果佢哋投反對票，長津開位一定會以些微票數被否決，於是泛民就表現到好不滿Tommy倉卒要求投票而離場抗議，正因為唔夠法定人數，工聯會焗住「坐定定喺度，乜都唔使做」，等撥款順利通過。

當然，齣戲結束後，總有啲「塘邊鶴」喺度解吓畫，好似新民黨田北辰就話唔覺得政府有任何陰謀，形容這次事件只係「人的疏忽，神的出手」喎。