中環出更：楊孫西拉隊嘗極品茅台
由貴州茅台集團及香港國酒茅台之友協會聯合主辦嘅鵬城之夜，前晚喺深圳喜來登酒店舉行，協會監事長兼全國政協常委楊孫西拉隊北上，與茅台酒公司董事長袁仁國等老友實行以酒會友。當晚筵開六十幾席，來自中港嘅數百名茅台發燒友，盡情暢飲每支市價近十萬元、珍藏五十年嘅極品茅台，認真係尊貴之夜。
當晚出席嘅酒友包括福建僑領施子清及兒子百仁基金會主席施榮忻，仲有楊孫西嘅公子菁英會主席楊華勇、協會秘書長吳永嘉（Jimmy）等兄弟。同場仲有一班廠家出席，包括德國寶董事長陳國民、寶星首飾廠老闆吳宏斌、家得路執董陳家偉、古珀行珠寶總裁沈運龍等，確係同聲同氣。
共百支50年佳釀
Jimmy話，大會預備咗一百支五十年極品茅台供大家享用，近年茅台極之渴市，身價暴漲，每支市價高達十萬港元，令人咋舌，難怪賓客成晚酒興甚濃，全場酒香洋溢，情緒高漲。卓妮問楊孫西收藏咗幾多靚茅台，佢笑笑口唔肯透露，但孫女下個月就出世，首次升呢做爺爺嘅佢勁開心，話擺百日宴時會攞出心愛珍藏同大家飲杯慶祝，至於準備咗乜嘢禮物送畀寶貝孫女，佢就話鍾意乜就買乜畀佢喎！
卓妮同場仲見到趕搭尾班車競選港區全國人大嘅中華總商會會董張俊勇（Thomas），佢拎住酒杯滿場飛，全力向嘉賓拉票。Thomas話，因為十一月底到古巴考察，到人大選舉截止報名當日先返港，所以嗱嗱聲去交表。佢話自己喺青年工作及商界服務好多年，好多朋友都支持佢參選，所以考慮一段時間後決定上陣，自己亦充滿信心。曾傳出參選人大嘅洪為民就話，諗都冇諗過會參選，反而全力支持Thomas喎！
卓妮