《好報》猛料多，讀者笑呵呵。萬眾期待嘅《好報》第二期尋日強勢出版，一如所料咁繼續受到熱烈追捧，繼續成為城中話題，可以講係老少咸宜，皆大歡喜！
睇報紙同做人一樣，最重要緊貼社會脈搏，掌握潮流趨勢，《好報》內容豐富，篇篇精彩，為傳媒揭開新一頁，為讀者帶來新感受，受到熱烈追捧係意料中事。嗱，不妨聽吓城中名人點講。前商務及經濟發展局局長馬時亨大讚《好報》版面及排位簡潔新穎，用色鮮艷有吸引力，內容豐富多元化，男女皆宜；立法會秘書長陳維安就讚《好報》結合收費報與免費報於一身，開創報業先河，極具策略性。
冇錯嘞，《好報》期期大爆內幕，猛料源源不絕，好人有好報嘅讀者自然識貨。好似今期咁吖，《好報》記者獨家專訪成龍，大爆呢位國際巨星鮮為人知嘅一面，令人津津樂道，正如讀者話齋，「極之吸引眼球」。除此之外，《好報》獨家踢爆淫賤黎出售台灣資產救亡嘅內幕，將佢面臨窮途末路嘅處境公諸於世，更加係嗒落有味。
呢單內幕猛料係咁嘅。壹淫媒流血不止，過去半年狂蝕九億三千三百萬元，加上債台高築，銀行貸款連上月嘅融資高達十億四千萬元，可以講瀕臨破產邊緣。本來呢，壹淫媒以一百七十五億元新台幣出售台灣業務，以為可以暫時止血，點知交易受到台灣各界反對，阻力重重，隨時臨尾香；更弊嘅係交易埋門一腳仲要被買家壓價二十五億元新台幣，即係話，就算淫賤黎最後好彩甩到手，償還債務七除八扣之後，真正落袋嘅實際唔多，最多都係左袋冚右袋咋，根本無助解決壹淫媒資金緊絀困境，猶如得個吉。權威人士形容今次交易「賣得到未必好，賣唔到渣都冇」，真係一啲都冇講錯。
更耐人尋味嘅係，淫賤黎賣台灣家當，簽約地點既唔係台灣，亦唔係香港，而係澳門，究竟乜嘢原因呢？原因就係要冚住種種唔見得光嘅內幕，事關買家背後可能另有金主，而且唔排除涉及內地控制嘅資金，消息指淫賤黎可能連香港業務都想賣埋添。
講到呢度，大家係咪覺得好諷刺呢，淫賤黎一向反中亂港，成日叫囂「天滅中共」，點知落難時居然向北大人求救，「賺錢時反共，賠錢時求共」，呢位所謂「民主鬥士」，原來係掛羊頭賣狗肉，反共係假，愛錢就真。不過咁，始終都係要北大人敵友不分，淫賤黎先至可以左右逢源，待價而沽啫。
一句講晒，《好報》實真確，冇老作，大家想知更多內幕猛料，一定要繼續留意。功夫茶再提醒大家一次，《好報》下期加料炮製，可能一分為二，內容更加豐富，星期五請早喇！