民主黨（白鴿黨）話要改革已經唔係咩新事，今屆喺立法會選舉失利後，白鴿黨表明要韜光養晦，仲話要政黨年輕化，但原來換血大計又係得個講字。該黨將於十六日選出新領導層，一度盛傳會由立法會議員新丁胡志偉同黃碧雲出任主席，以做到換血效果，但最近就有新講法，就係胡志偉竟然係出選副主席，令主席一職變相成為劉慧卿同單仲偕（(先刂)雞）之爭，甚至好大機會由(先刂)雞做主席添，即係咩血都無換過。
不過，(先刂)雞之前空降港島參選立法會已惹來黨內部分人士不滿，而佢中間偏右嘅政策取態亦有人睇唔過眼，但肯企出嚟製造「真正」競爭嘅人始終唔多，有乳鴿對此又睇唔過眼，據聞正密謀挑機，搭個台整個選舉辯論逼吓(先刂)雞表態。至於一度傳出將會有八十後出任嘅副主席一職，原本除咗蔡耀昌外，乳鴿之輩如南區區議員羅健熙及葵青區區議員林立志亦先後表態有意參選，點知隨着胡志偉忽然改選副主席，令年輕一輩當選副主席嘅機會微乎其微。
有風聲傳出，胡志偉忽然改選副主席亦有「任務」，就係想制衡(先刂)雞，但就要犧牲乳鴿。不過，即使唔係咁，乳鴿一聽到踴躍出選亦都唔見得係好事，乳鴿互相介票反而會造就舊人當選。