政情：林D9護貪曾心未變
一向護主心切到畀人叫做「林公公」嘅前政務司司長林瑞麟（林D9），雖然已經離開政府投奔校園嘅懷抱讀神學，但仍然不改對主子嘅忠心耿耿。尋日佢同前律政司司長黃仁龍一齊出席樹仁大學畢業禮時，當黃仁龍被記者追問對基本法委員會副主任梁愛詩言論嘅睇法時，林D9就好似自動波咁，第一時間就撲出嚟話香港嘅法治精神同制度已經落實得好好喇，唔覺得香港嘅法治烏雲密布咁話。
林D9同黃仁龍同獲樹仁大學頒發榮譽法學博士，原本喺英國牛津大學修讀神學嘅林D9都返港出席典禮。林D9又話香港已邁向普選o架喇，又話已經成立嘅制度應該保留，佢仲話唔覺得香港嘅法治烏雲密布，大家應該向前看咁話。
廉署放軟手腳
不過，林D9根本係擦鞋擦過龍，亦講得唔正確，事關過去本港司法制度經常出現唔公平情況，有時判決顛倒是非黑白，而且又選擇性檢控。至於廉政公署對於調查貪官污吏亦放軟手腳，甚至出現包庇，淨係睇「貪曾」前特首曾蔭權爵士貪盡海陸空後，廉署仍未有行動就知幾荒謬喇！