政情：發叔聖誕新年要撲水
鄉議局新大樓搬去沙田石門新大樓已有一年，但之前為興建新大樓而借落嘅貸款，仲有二千幾萬元未清還，加上九龍塘鄉議局舊大樓又未能出售套現，令局方一度陷入資金周轉困難。鄉議局主席劉皇發尋日喺立法會透露，長實集團主席李嘉誠尋日就捐咗五百萬元畀鄉議局，令局方嘅財政壓力稍為減輕，而局方喺嚟緊聖誕及新年會加插一項特別節目，就係落村籌錢喇。
村民不滿 籌錢成問題
發叔話，聖誕節及新年要密密落村籌錢，會去七百幾條鄉村籌款，希望籌夠錢還債。佢又話，其實只要一人肯捐二萬元，就應該湊夠條數o架喇！不過，今時唔同往日，鄉議局處理新界村屋僭建問題惹來好多村民不滿，啲村民係咪肯捐錢都成問題，加上局方當年亦曾要求廿七個鄉事委員會認捐交數，但當時嘅反應都係麻麻哋，發叔就因此而發火向一眾鄉紳訓話，叫大家飲水思源。