政情：劉江華做官恐有損失
民建聯副主席、沙田區議員劉江華與同黨觀塘區議員陳百里入政府在望，客觀上可以令該黨有更多執政經驗嘅人才，但正所謂「有得必有失」，兩人加入政府前必定要辭去區議員職務。根據往績顯示，突然喺區議會任期內中途換人，「替補」參選者幾乎都冇好下場，最終可能贏個官位輸番個議席。不過，副局長同政治助理人工係區議員酬金五倍至十倍，人望「錢」途實在無可厚非。
本報尋日率先報道，劉江華極有可能出任政制及內地事務局副局長，而陳百里就做商務及經濟發展局局長蘇錦樑嘅政治助理，如果佢哋最終加入政府，分分鐘惹來難以掌控嘅連鎖反應。當中尤以劉江華喺田心選區嘅議席有最多變數，事關該區議席原屬公民力量（公記）地盤，只係當初劉江華想搵地方落腳鋪路參選立法會超級區議會，公記先捱義氣讓個議席出來，如果劉江華為入政府而離棄選民，因而令公記喺補選中失去支持而落敗，咁佢真係唔知點同公記交代喇！
鞍泰補選 民記僅險勝
事實上，過去亦有區議員因為入政府而失去議席嘅例子，講緊嘅係時為匯賢智庫南區區議員陳岳鵬，當年佢加入政府做特首辦特別助理，事後該議席拱手相讓畀前公民黨成員司馬文，之後建制派想搵人搶番個議席都無功而還。最近嘅沙田區議會鞍泰選區補選亦差啲陰溝裏翻船，民建聯「替補者」招文亮要出盡九牛二虎之力，先僅以四十五票之差成功奪回因黨友破產而失去嘅議席。
除咗地區對能否保住議席擔驚受怕外，泛民主派亦對劉江華「升呢」在望炮聲隆隆，批評「劉江華保護警權就叻，邊會識得人權工作」，同時日後政府施政亦都冇得話唔關民建聯嘅事，有人仲估計政府搵劉江華做副局長，其實一早已對新政改方案打定輸數喎。話時話，劉、陳兩人加入政府只係程序問題，至於點樣可以締造「雙贏」局面，即「贏官位又贏議席」，呢個就要睇吓該黨有乜好橋喇。