中環出更：曾昭穎「零頭」夠high tea
恒豐企業主要股東李德義兒子李建勤一年前被高院裁定要向前妻曾昭穎支付天價十二億元贍養費，雖然曾昭穎前日表明至今只係收到前夫支付嘅「零頭」，但佢嘅生活一切如常。
卓妮上周五就見曾昭穎帶埋愛女、工人與兩位女性友人喺中環置地廣場Cafe Landmark輕鬆high tea，坐足個多小時先至離開。曾昭穎歎茶期間，仍不忘逗寶貝女開心，母愛滿溢。
因為爭產案而成為咗公眾名人，曾昭穎出入都特別小心，當日卓妮見佢有兩個疑似保鏢坐喺遠處隱蔽位置用餐，兩枱相距約十呎，表面上好似互不相干，但盡忠職守嘅保鏢，全程都金睛火眼咁望實曾昭穎張枱嘅一舉一動。曾昭穎打扮樸素，亦只係柯打咗啲普通食品，包括一客龍蝦意粉及一籃麵包，同埋為愛女柯打咗一杯鮮果奶昔。
輕撫女兒 母愛爆燈
只見曾昭穎四歲嘅囡囡剪咗個冬菇頭，非常活潑可愛，成隻白兔仔咁跳跳紮坐唔定，工人姐姐要好花心機咁餵佢食嘢，而且食嘅時候表情多多，非常討人歡喜。身邊嘅曾昭穎見囡囡食得咁開心，好幾次都忍唔住伸手輕撫愛女嘅頭髮，臉上不其然泛起幸福滿足嘅笑容，真係有女萬事足。
卓妮