黃先生為政府醫療輔助隊成員，屬業餘性質，按規例每兩個月會獲發放一次薪津補助。不過，黃卻發現九月份的薪津遲遲未獲發放，直指事件令不少隊員同感不滿，「政府應該係僱主嘅榜樣，準時出糧，但點解今次會遲咗幾個禮拜都仲未過數，又冇同我哋交代？」
醫療輔助隊發言人解釋，經調查後發現因出現行政問題，導致是次延遲發放薪津，但強調僅屬個別事件。發言人稱，該隊當時已即時糾正問題，並於十一月五日向隊員發放薪津，為免同類事件再次發生，該隊內部亦已作出檢討，改善有關行政安排。
「明明到十一月八號都未收到錢先打嚟《東方》投訴，究竟佢（醫療輔助隊）係講大話，定係混亂到連日期都搞錯晒？」黃先生對醫療輔助隊答覆大感詫異，並指準時發放薪津屬僱主責任，要求當局檢討，避免日後再發生同類事件。