好多政界人士恨做立法會議員恨到發燒，但其實議員生涯絕非想像中咁尊貴，又要長時間開會，又要同人鬧交，又要處理市民投訴，唔夠精神同體力隨時捱到病。有位代號「粟米片」嘅立法會新丁，就因為搏表現搏得太盡，做咗個多月精神已瀕臨崩潰，要家人私下向其他議員「求救」，希望勸服「粟米片」顧吓自己嘅身體、精神同家庭健康。
「粟米片」喺當選前知名度不高，為咗盡快打響個朵，一上任就搏到盡。有人見到佢晨早七點幾鐘已現身立法會大樓，就算冇人拉布都做到夜一夜先走，更甚係無論關唔關佢事嘅議題同會議，佢都差隻腳落去爭曝光。加上佢本身仲有份正職要兼顧，自然一日四十八小時都唔夠用。
據聞「粟米片」嘅家人，最近向與「粟米片」友好嘅議員「求救」，話佢做咗個多月議員，已有體力不支同精神過度緊張嘅徵狀，但又唔肯聽家人勸告放低部分工作，擔心再咁落去會出事，希望其他議員幫手勸告。查實做議員都有好多種做法，開會遲到早退、唔睇文件唔出聲、或者發言鬧人兩句就繼續瞓覺睇馬經嘅大有人在，仲係輕鬆連任添，所以盡咗力就已有交代。