依家個個都話要環保，環保其實係要由教育做起嘅。教育局局長吳克儉尋日出席仁濟醫院轄下學校嘅「綠色教育育己育人研討會」開幕禮時就話，覺得自己身為政府高官都好應該以身作則，帶頭去推動環保。
吳克儉話自己平時返工開會同出席學校活動時減廢有三招，就係唔飲樽裝水、唔用真花做嘅襟花、同埋唔收紀念品，咁就可以減少用膠樽同鮮花啦。
為研討會嘅開幕禮致詞嘅吳克儉就話，佢哋喺政府總部成日都要開會，少不免會準備啲水畀啲與會者，等大家吹水吹到口乾時都有水飲。不過以前佢哋就慣咗用樽裝水，用膠樽固然唔環保，啲人飲剩啲水亦都只能倒咗佢，真係嘥晒。於是佢哋就決定唔再用樽裝水，試驗咗一至兩個星期之後大家都已經習慣。
吳克儉又話，佢成日都出席學校活動，校方經常都會送紀念品，試過最誇張嘅係一個活動送五份紀念品。吳克儉就覺得好浪費，所以依家出席活動時都唔會收紀念品。
佢仲有個習慣，就係出席活動戴襟花前摸吓朵花，如果係鮮花嘅話佢就唔會戴喇，因為唔可以循環再用，唔環保喎。