政情：林鄭：誰能明白我
唔通真係無敵是最寂寞？正當政務司司長林鄭月娥嘅仕途攀爬到一人之下萬人之上之際，原來簡單到製作一個powerpoint仍然要親力親為，原因只有一個，仲要係林鄭自己講嘅：「no colleagues will actually read my mind （無同事能明白我）」，不禁令人輕嘆一句，誰明林鄭心？
林鄭尋日出席由貿易發展局主辦嘅「香港論壇」，向數百多個外國商界領袖推銷香港。做咗幾個月就瘦咗成個圈嘅林鄭出場時非常肉緊，親自製作十幾版powerpoint，話要畀一眾商界領袖有視覺享受喎，powerpoint最後就有一張國家領導人今年訪港期間同林鄭嘅合照，照咁睇個powerpoint似係滿足林鄭自己多啲喎。
其實林鄭個powerpoint無咩驚喜，只係介紹吓六大產業同CEPA，又提吓政府喺增加土地供應、推行環保嘅政策，大部分內容都係舊調重彈。不過，林鄭就愈講愈起勁，仲話本港有好多發展機遇，而政府亦做緊好多工作，之不過有好多人即使有心睇報紙都唔會發現，所以叫台下咁多位商界領袖要同佢一齊幫手推銷香港。