政情：阿牛連瘀兩鑊
社民連曾健成（阿牛）尋日朝早拉埋幾個街坊一齊去行政會議請願，要求政府喺柴灣增建升降機，由於佢攜帶嘅請願道具太大，一度被拒於門外，搞完一大輪先至成功進入特首辦請願。不過，期間阿牛只掛住對傳媒鏡頭面前伸冤告狀，就連行會成員胡紅玉經過都見唔到，最後仲要胡紅玉親自拍吓阿牛，阿牛先至醒水，再手舞足蹈重新申訴多一次，真係瘀到爆。
搵何俊仁間律師行出事
阿牛喺行會瘀完，之後法庭有單官司又令佢瘀多鑊。話說阿牛喺去年東區區議會選舉落敗後，因不服選舉結果而向法庭提出選舉呈請，直到月前佢評估過勝算後決定撤回選舉呈請，尋日開庭處理有關撤回申請。雖然阿牛冇到庭，但佢嘅代表律師就被法官訓話，指有關呈請處理拖得太耐，又冇解釋，實在「慘不忍睹」，認為涉及公眾利益嘅事情應盡快處理。
阿牛單官司之所以拖咁耐，原來係幫佢打官司嘅何俊仁間律師行喺處理上有甩漏，過程中送漏咗文件畀民政事務局，因而拖慢案件處理，真係所託非人。阿牛嘅代表律師就解釋，佢哋只係義務幫阿牛，結果被法官訓斥話，呢種態度一定要改，事關義務都要盡力，否則踐踏義務嘅意義。阿牛一日內連瘀兩鑊，確係出師不利。