政情：大獨裁者葉國謙犯眾怒
立法會各大事務委員會主席有大權操縱議員發言，如果控制得宜可建立主席威信，相反可能會惹來獨裁嘅批評。講緊嘅係立法會保安事務委員會主席葉國謙，佢尋日主持會議時「獨裁者」上身，一夠發言時間就有理無理「劃線」，即使議員認為港府官員未回答問題，甚至係有官員想繼續闡釋政策內容，都無情地畀阿謙阻截，倘阿謙繼續以此高壓手段主持會議，睇怕遲早會畀泛民主派啲「重炮手」重點招呼佢。
過去保安事務向來由白鴿黨涂謹申「唱獨腳戲」，即使民建聯副主席劉江華不時就保安事務發聲抗衡，但外間嘅注視程度始終稍遜一籌，適逢劉江華喺剛過去嘅立法會選舉落選，建制派不敢怠慢即時搵到阿謙「替補」，仲要做埋主席，殊不知阿謙「出師未捷身先死」，其強硬主持會議作風惹來不少批評。
話說保安事務委員會尋日討論截取通訊及監察事務專員嘅周年報告，起初一直相安無事，但到工黨何秀蘭問及如果執法人員有違規行為，當局會有何處分程序時，保安局局長黎棟國一直耐性回應有關提問，甚至之後想將問題交畀在場嘅保安局副秘書長再作闡釋時，點知阿謙突然「獨裁者」上身，以五分鐘時間已到為由，連官員想再作解釋嘅機會都變相「封殺」。
建制泛民皆封殺
隨後再有泛民議員鍥而不捨追問執法人員喺截取通訊時嘅心態問題，該議員不滿當局未有回應提問，要求主席再給予時間解答，阿謙竟然一聲「好」，旋即將發言權交畀另一名議員，做法令人側目。或者大家以為阿謙只對泛民議員特別嚴厲，但其實佢對於建制派議員一樣冇情講。
當工業界議員林大輝要求當局，將入境處管制站運作嘅新出入境管制系統嘅比較資料數據交畀議員時，阿謙竟然以「夠鐘」為名話唔可以，搞到大輝都按捺不住疑向阿謙抗議話：「主席，你唔想知吓個比較o架咩？」阿謙隨後堅持己見話，雖然佢都想知，但實際唔可以，反促當局書面回覆議員，難怪事後有議員疑似講玩笑話，懷念昔日由涂謹申同劉江華主持會議嘅光景，因為至少可以暢所欲言，有嗰句講嗰句喎！